ދުނިޔޭގެ ތައްޓަށް ކުޅޭ ފުޓްބޯޅަ މުބާރާތަކީ ދިވެހިން އެންމެ ގަޔާވާ ފުޓްބޯޅަ މުބާރާތެވެ. އެންމެ ގިނަ ބަޔަކު އެކަމަކަށް ހުސްވާ ކުޅިވަރުގެ އެންމެ ބޮޑު އީދެވެ. މިއީ އާއިލާތައް އެއްތަންވެ، ކެއިންބުއިމާއި މުނިފޫހިފިލުވުމާއި މައުލޫމާތު ބަދަލުކުރުން ހިމެނޭ އިޖްތިމާއީ އެންމެ ބޮޑު އެއް ހަރަކާތެކެވެ. ގަތަރުގައި އަންނަ މަހުގެ 20 އިން ޑިސެމްބަރު މަހުގެ 18އަށް ބާއްވާ ވޯލްޑްކަޕްގެ ހުރިހާ މެޗެއް ރާއްޖެ ޓީވީއިން ވަގުތުން ގެނެސްދޭނަމެވެ.

ކުޅިވަރާއި ރާއްޖެ ޓީވީ ވަނީ ގުޅިލާމެހިފަ އެވެ. އަތޮޅުތެރޭގައި ކުޅެވޭ ކުޅިވަރު މުބާރާތްތަކާއި، ރާއްޖޭގެ އެތްލީޓުން ގައުމީ ފެންވަރުގަ އާއި ބައިނަލް އަގްވާމީ މައިދާނުގައި ކުޅޭ ކުޅިވަރުތައް ރާއްޖެ ޓީވީން ވަނީ މީގެ ކުރިން ވަގުތުން ގެނެސްދީފައެވެ. އަދި ޒުވާނުންނާއި ކުޅިވަރަށް ރާއްޖެ ޓީވީގެ އޮންއެއާގެ ވަރަށް ގިނަ ވަގުތުތައް ވަނީ ހުސްކޮށްފަ އެވެ. ދިވެހިންގެ ޝައުގުވެރިކަން ހުންނަ ބައިނަލް އަގްވާމީ ބޮޑެތި ކުޅިވަރު މުބާރާތްތައް ވެސް ދިވެހިންނާ ހަމައަށް މީގެކުރިން ރާއްޖެ ޓީވީން ގެނެސްދިނީ އިޖްތިމާއީ ހިދުމަތެއްގެ ގޮތުންނެވެ.

ފުޓްބޯޅައަކީ މިއަދު ހަމައެކަނި ކުޅިވަރެއްނޫނެވެ. އެއީ މިޒަމާނުގައި ގަނޑުކޮށް ވިއްކާލެވޭ އަގުބޮޑު ވިޔަފާރިއެކެވެ. މިހެންވެ މުބާރާތުގެ ރައިޓްސް ގަންނަން ބޮޑު ހޭދައެއް ކުރަންޖެހުނެވެ. ނަމަވެސް ދިވެހި ވިސްނުމާއި ހިޔާލާއި، ފިކުރާއެކު، ދިވެހިންގެ ފަންނުވެރިކަން ހިމަނައިގެން ވޯލްޑްކަޕް ދިވެހިންނަށް ގެނެސްދޭން ރާއްޖެ ޓީވީން ނިންމީ، މިކަމަކީ ޓީވީ ބެލުންތެރިންނަށް ކޮށްދޭންޖެހޭ މުހިންމު އިޖްތިމާއީ ޒިންމާއެއްކަމުގައި ދެކިގެންނެވެ.

ރާއްޖެޓީވީގެ ވޯލްޑްކަޕް ކަވަރޭޖް މުއްސަނދިކޮށްފައިވާނީ ބެލުންތެރިންނަށް އެންމެ ކަމުދާނެ އުކުޅުތައް ހިމަނައިގެންނެވެ. ފުޓްބޯޅަ ކޯޗުންނާއި މި ކުޅިވަރު ރާވައި ހިންގާ މީހުންގެ ތެރެއިން ރާއްޖޭގައި ތިބި އެންމެ ފުންނާބުއުސް ފަރާތްތައް ފެނިގެންދާނީ ރާއްޖެޓީވީންނެވެ. އެބޭފުޅުންގެ އެނާލިސިސް ފުރިހަމަވެފައި އެހާމެ ޒަމާނީވާނެ އެވެ. މިމުބާރާތައްޓަކައި އެކުލަވާލި ރާއްޖެ ޓީވީގެ ޕްރެޒެންޓަރުންގެ ޓީމުގައި ތަޖުރިބާ އާއި ޒުވާން ވިސްނުން ހުންނާނެ އެވެ.

މުބާރާތުގެ ކުރިން ވޯލްޑްކަޕުގެ އެންމެ ފުރިހަމަ މައުލޫމާތު ގެނެސްދިނުމަށް ރާއްޖެ ޓީވީން ތައާރަފްކުރާ ވޯލްޑްކަޕް ވެބްސައިޓުގައި އެންމެ ކަމުދާނެ ވާހަކަތައް ހިމަނާފައިވާނެ އެވެ. ވޯލްޑްކަޕަށް ކޮލިފައިވުމުގެ ދަތުރުތަކުގައި ދިވެހިންކުރި ތަޖުރިބާތަކާއި ލިބުނު އުފަލާއި ހިތްދަތި ނަތީޖާތަކުގެ ވާހަކަތަކަކީ ތާރީހަށްޓަކައިވެސް ނުކިޔައި ދޫކޮށްލާވަރުގެ ވާހަކަތަކެއްނޫނެވެ. މުބާރާތަށް ސިކުނޑި ތައްޔާރުކުމަށް ކުޅުންތެރިންނާއި މުބާރާތް ކުޅޭ ގައުމުތަކުގެ މައުލޫމާތުން އަމިއްލަ ނަފްސު މުއްސަދިކުރެވޭނެ ހުރިހާ ކާޑެއް މިފޮތުގައި ހިމަނާފައިވާނެ އެވެ. ގަތަރުގެ ތައްޔާރީތަކާއި ހޫނު ގައުމެއް ފިނިކޮށްގެން ވޯލްޑްކަޕް ބާއްވާ ގޮތުގެ އެންމެހާ މައުލޫމާތައް މި ފޮތުން ލިބިގެންދާނެ އެވެ.

މިފަދަ ކޮންމެ ކަމެއްގައި އަޅުގަނޑުމެންގެ އެންމެ ބޮޑު ހިތްހަމަޖެހުމަކީ ބެލުންތެރިންނާއި ކިއުންތެރިންނާއި ސްޕޮންސަރުންގެ ފަރާތުން ލިބޭފުރިހަމަ އިތުބާރެވެ. ރާއްޖެޓީވީގެ ވޯލްޑްކަޕް ކަވަރރޭޖް އިމެއްނެތި އަބަދުވެސް ތިޔަބޭފުޅުންނާ ހުޅުވާލެވިފައިވާނެއެވެ.

ވޯލްޑްކަޕަކީ ދުނިޔޭގެ އެންމެނަށް އުފާވެރިކަން ގެނެސްދޭ މުބާރާތެކެވެ. ގަތަރުގައި މި ފަހަރުގެ މުބާރާތް ފަށަން މިހާރު އޮތީ ކުޑަދުވަސްކޮޅެކެވެ. ވޯލްޑްކަޕާ ގުޅޭގޮތުން ތަފާތު އުފާވެރިވާހަކަތައް ދެކެވުނަސް މިވަގުތަކީ ގަތަރުގައި މި މުބާރާތް ފަށަން ވަރަށް ސީރިއަސް މަސައްކަތްތަކެއް ކުރެވެމުންދާ ދުވަސްވަރެކެވެ. މިހެންވެ މުބާރާތުގައި ކުޅޭ ހުރިހާ ގައުމަކަށް ވެސް ކާމިޔާބީ އަށް އެދެމެވެ. ގަތަރުގެ ވެރިރަށް ދޯހާގައި ބާއްވާ މި މުބާރާތް ވެގެންދާނީ މިހާތަނަށް ބާއްވާ އެންމެ ކާމިޔާބު ވޯލްޑްކަޕަށެވެ.

ދުނިޔޭގައި ބާއްވާ އެންމެ ކުލަގަދަ މިމުބާރާތް މި ފަހަރު ގަތަރުން ތިން މިލިއަން މީހުން އަދި ދުނިޔޭގެ އެކި ކަންކޮޅުތަކުން ފަސް ބިލިއަން މީހުން ބަލާނެ ކަމަށް މިވަނީ އަންދާޒާކުރެވިފަ އެވެ. ދުނިޔޭގެ އެންމެން ވޯލްޑްކަޕަށްޓަކައި އެކުވެރިވަނީ މި ސަބަބަށްޓަކަ އެވެ. މިފަދަ ކާމިޔާބު މުބާރާތަކަށް ގަތަރު ތައްޔާރުވެފައިވަނީ ވަރަށް ފުރިހަމައަށެވެ. މިހެންވެ ގތަރުގެ ރައްޔިތުންނާއި ގަތަރުގެ އަމީރަށާއި އެންމެހާ އަރަބިންނަށް މި ފުރުސަތުގައި ޝުކުރު ދަންނަވެމެވެ.

މިއަދު ދުނިޔޭގެ އެކި ކަންކޮޅުތަކުގައި ތަފާތު ހިތްހަމަނުޖެހުންތައް ފެނިގެންދިޔަ ނަމަވެސް ވޯލްޑްކަޕުގެ ސަބަބުން ދުނިޔެ އަށް ހަމަޖެހުމާއި ސުލްހަ މަސަލަސްކަން ގެނުވާނެ އެވެ. މި މުބާރާތް ބާއްވަންޖެހޭ އެންމެ މުހިންމު އެއް ސަބަބަކީ ވެސް މި އެވެ. މި މުބާރާތް ބަލާނީ ހަމައެކަނި އާއްމު ރައްޔިތުން އެކަންޏެއްނޫނެވެ. ދުނިޔޭގެ އެކި ލީޑަރުން ވެސް މި މުބާރާތް ބަލަމުންދާނެ އެވެ. އަދި ފުޓްބޯޅައިގެ ތެރެއިން ދެކެވޭ ތަފާތު ވާހަކަތަކަކީ ސުލްހަ އަށް ބާރު ލިބޭ އަދި ލީޑަރުން އެއްތަންވެ މަޝްވަރާއަށް ފުރުސަތު ހުޅުވި އެ ވާހަކަތަކުން ކާމިޔާބުލިބޭ މާހައުލަކަށްވެދެ އެވެ.